12–13-åringar på full fart inn

På ein av Noregs største bloggnettstader, Blogg.no, er dei yngste bloggarane berre ni år, og denne aldersgruppa er i vekst.

– Vi registrerer at jenter heilt nede i niårsalderen bloggar, seier dagleg leiar i Blogg.no. – Men då bloggar dei gjerne saman med nokon eldre, ofte ein av foreldra. Er du under 13 år, må du dessutan ha samtykke frå føresette for å få opprette ein blogg. Gjennomsnittsalderen på ein bloggar er 25 år, men 12–13-åringane er på full fart inn, seier han.

Kjelde: NRK Nordland

10 år gammal bloggar mobba på nett

Då ein norsk 10-åring laga ein blogg om seg sjølv og livet sitt, gjekk det veldig gale. Nokre månader seinare hadde tusenvis av menneske vore inne på bloggen hennar, og fleire hadde skrive stygge kommentarar. Bloggen blei fjerna, men andre nettbrukarar hadde lagra bilete og videoar frå bloggen hennar på sine eigne datamaskiner. Dei laga remiksar av filmane som dei sende rundt til venner på nettet, og dei laga fæle Facebook-grupper mot henne. Ein av videoane blei sett over 180 000 gonger.

I etterkant har jenta fått mange støttemeldingar. Nokre meiner også at 10-åringar er for unge til å blogge.

Kjelde: Teknologirådet

Bloggar ikkje om personlege ting

Før var det dagboka som fekk dei innarste tankane og hemmelegheitene, men i dag skriv stadig fleire unge jenter om personlege ting i bloggar på nettet.

 – Det starta med å setje ord på tankar, seier ein 12 år gammal bloggar frå Beiarn i Nordland. – Eg oppdaga at det var lett å skrive, også om tema som var vanskelege.

Foreldra følgjer nøye med på kva dottera legg ut, og den unge bloggaren seier ho er bevisst på kva ho skriv.

– Eg legg aldri ut personlege opplysningar. Eg veit at ting eg legg ut, kan bli vanskelege å slette seinare, så eg må tenkje gjennom kva eg skriv, og korleis andre kan reagere.

Kjelde: NRK Nordland